छोटया मोठया व्यापाऱ्यांना दैनंदिन व्यवसायासाठी परवानगी द्या - आमदार प्रशांत ठाकूर

 

 

 

 

 

 

 

पनवेल :पनवेल महानगरपालिका हद्दीतील छोटयामोठया व्यापाऱ्यांना दैनंदिन व्यवसाय करण्यासाठी परवानगी देण्याची मागणी आमदार प्रशांत ठाकूर यांनी पनवेल महानगरपालिकेचे आयुक्त सुधाकर देशमुख यांच्याकडे केली आहे. आमदार प्रशांत ठाकूर यांनी यासंदर्भात आयुक्तांना दिलेल्या निवेदनात म्हंटले आहे कि, पनवेल महानगरपालिका हद्दीत सुरुवातीच्या काळात केंद्र शासनाने जाहिर केलेला व महाराष्ट्र शासनाने वाढवलेला असा लॉकडाऊन हा २४ मार्च ते ३१ मे पर्यंत सुरु राहिला. काही प्रमाणात मे महिन्यात व नंतर जून महिन्यात उद्योग, व्यवसाय व व्यापार यांची गाडी स्थळावर येते ना येते तोच कोरोना संसर्गाची साखळी तोडण्याच्या नावाखाली महापालिकेमार्फत ३ जुलै पासून पुन्हा लॉकडाऊन जाहिर झाला. लॉकडाऊनमध्ये दुकाने पूर्णपणे बंद असल्यामुळे उद्योजकांना व्यापाऱ्यांना फार मोठ्या प्रमाणात आर्थिक नुकसान सहन करावे लागले आहे.

           सध्यस्थितीत १ ऑगस्टपासून लॉकडाऊनचे नियम जाहिर करताना दररोज सम-विषम तारखेप्रमाणे छोटया-मोठया व्यापाऱ्यांची दुकाने सुरू ठेवलेली आहेत . परंतू पनवेल मधील डी-मार्ट तसेच सुपर /मिनी मार्केट मधील व्यवहार लॉकडाऊनमधील नियमांचा भंग करून दररोज सुरळीतपणे सुरू आहेत. व यासंदर्भात आपणांस यापूर्वीही व्हिडीओ क्लिप व्हाट्सअँपद्वारे पाठविलेली आहे. ज्याप्रमाणे डी-मार्ट व सुपर / मिनी मार्केट सुरू आहेत. त्याचप्रमाणे सोशल डिस्टसिंगचे नियम पाळून महापालिका हद्दीतील छोटया-मोठया उद्योगधंद्यांना देखील दररोज व्यवहार करण्याची परवानगी मिळावी अशी संपूर्ण पनवेल महापालिका क्षेत्रातील व्यापाऱ्यांनी मागणी केली असून सदर मागणी अमान्य केल्यास व्यापाऱ्यांनी आंदोलनाचे पाऊल उचलण्याचे ठरवले आहे. सदर व्यापाऱ्यांची मागणी ही रास्त असून नियमांचे पालन करून आपला व्यवसाय दैनंदिन सुरू करत असतील तर महापालिकेने परवानगी देणे गरजेचे असे निवेदनात अधोरेखित करून महानगरपालिका हद्दीतील छोटया मोठया व्यापाऱ्यांना दैनंदिन व्यवसाय करण्यासाठी परवानगी देण्याची मागणी आमदार प्रशांत ठाकूर यांनी केली असून यासंदर्भात ठोस कार्यवाही होणार नसेल तर पनवेल शहर भारतीय जनता पार्टी मार्फत व्यापाऱ्यांच्या आंदोलनाला पाठिंबा देईल, असेही आमदार प्रशांत ठाकूर यांनी जाहीर केले आहे